[轉載/Youtube] 旺角行人專用區千奇百怪珍禽異獸乜都有，噚日仲玩到清宮太監VS艾味味VS周潤發鬧巿槍戰，詭異得嚟途人笑到一殼眼淚，全因港台《頭條新聞》登登登登回歸。聽講太后同小豪子會喺辛亥革命中走出皇宮，從此流落民間，太后仲會勾搭艾味味推翻自己，味味又會同國父對話，同發哥讓子彈飛，總之就錯綜複雜曲折離奇，再加埋名嘴陶傑同Rapper馬米，呢期頭條真係要落足眼力。小豪子怕一鋪清袋
太后吳志森話今次播得幾耐唔知，總之就呢個禮拜五晚無綫播先，7月再轉去亞視，具體做到幾時真係唔知，應該冇上次咁短，希望多過10集。太后回歸不失霸氣，佢話不嬲都冇人敢教佢咩做得咩唔做得，「邊個敢教呀？一講我就講出去佢咪死，暫時嚟講冇任何禁區，總之一樣咁辣咁有火，講嘢冇顧忌，講人哋唔敢講嘅嘢」。
不過小豪子曾志豪就好似冇咁樂觀喇，因為呢輯用得太多錢，成個皇城景搭咗出嚟，佢擔心之後無以為繼，「唔知係咪上一輯風雨欲來，今次一鋪清袋，到時冇錢咪話冇得做囉」。小豪子話，今次咁重成本，又派杯麪廁紙筒又借晒服裝咁豪，佢做咁多年都未試過，家好擔心冇糧出先甜後苦，「荷李活嘅製作，我哋呢啲做開小本嘢嘅唔係咁慣o架嘛，會唔會有今生冇來世爛尾都未知，可能因為老闆未返工啩」。
頭條再嚟，百無禁忌，廣播處長「小麒子」黃華麒加入病官行列唔再續約之後，個位一直懸空到家，唔知係咪因為咁，頭條先可以強勢回歸，好多巿民噚日特登去旺角捧場，好多人都係超人、太后同埋小豪子嘅粉絲。小市民薛生話之前好驚個節目cut咗之後唔會返嚟，家個心定晒，又讚個節目好到肉，講到巿民心聲，至鍾意佢哋剪MV同埋流行曲諷刺時弊，希望個節目長播長有咁話。睇嚟小豪子擔心都係多餘，只要巿民撐住，言論自由邊個阻得住？
各人物今輯搞乜？
《吳志森飾太后》太后本來仲係太后，辛亥革命之後就要走佬，降呢變平民，走出皇宮，入平民百姓家，時空交錯，由晚清做到民國。
《超人飾艾味味》艾味味會同歷史人物對話，又會搞行為藝術，周街塗鴉，已經準備好為藝術而犧牲；至於塗鴉少女，就有成班人排住隊扮。
《小新飾土豪》第一集會做土豪，讓子彈飛一會，之後會用返廣告嚟做軸心。新廣告內容複雜，都幾難搞，可能會用全城熱話嘅「便便」廣告。
《曾志豪飾小豪子》錦衣玉食就冇o架喇，不過都會keep住嗰種放棄唔到昔日皇宮生活嘅陋習。太后會勾搭艾味味，推翻皇朝，劇情高潮迭起，希望唔好爛尾。
有嘢送：射太后塊面 送你一杯麪
熱辣辣嘅杯麪可謂OT時嘅人間美食，但唔知點解發明咗咁耐，今日先有人發揚光大。港台節目《頭條新聞》禮拜五重出江湖，噚日喺MK行人專用區派杯麪（圖）造勢，途人只要射太后個紙板一槍就有得攞，子彈款式繁多，有「讓味味飛」、「讓工資飛」畀大家選擇，有巿民怨氣好重，開槍嗰刻大叫「加人工」震懾四方，之後個個有樣學樣，當正太后係觀音。
八方崇尚非暴力唔玩槍，好彩太后都私人醒咗個畀八方，但睇睇先發現唔對路，呢個「合人道」杯麪辛……亥口味，無添加茉莉花革命濃湯，但加咗自由民主兩包、民脂民膏抽取物、抗貧維他命M，仲要有河蟹同蝦人。
入面竟然冇麪！
雖則話份量係一人一票，但睇嚟未必人人食得落，阿爺咁大年紀隨時鯁親，特區高官又塞血管又腎虧更加唔掂得。好彩呢個只係杯麪造型廁紙筒，否則中國人食咗呢個杯麪，真係百般滋味在心頭。
0 comments:
Post a Comment