[轉載/Youtube] 全港最人氣旺盛嘅網上討論區「高登」，網民瀏覽量固之然傲視網絡世界，收律師信數量據稱都冠絕同儕，揸fit人多次跪求巴打絲打手下留情，否則高登俾人告到落閘，盞大家失去呢個暢所欲言園地。言猶在耳，噚日高登討論區無聲無息「熄登」逾10小時，搞到一班日蒲夜蒲高登嘅網民不知幾空虛，直至噚日下晝近4點網頁才重開，正所謂無竹令人俗，無高登唔舒服，好多高登友紛紛訴苦，話無處「登高」令人茶飯不思，真係空虛到頭痕；有高登友更質疑「熄登」或與近日高登惹官非有關。
被入稟控文章誹謗
話說上星期有人入稟高等法院，控告三間網絡公司誹謗，高登係其中之一，涉及六篇討論文章，入稟內容要求高登供出20個高登網民真正身份。唔夠兩日，再有公司入稟控告高登討論區內有22篇文章涉嫌誹謗，由於「熄登」事件發生在高登被控告之後，有高登友噚日在高登討論區重開後留言，懷疑「熄登」與官司纏身有關。
高登友一向言論大膽，高登討論區亦曾因網民留言而惹官非，因此有人將今次「熄登」聯想到與官非有關十分正常，高登App喺「熄登」期間更彈出告示，話估計admin係為咗應付官司，所以對舊posts做「大檢查」同「大掃除」喎！八方噚日試圖聯絡高登行政總裁林祖舜，想向admin了解事件來龍去脈，可惜一直未收到回覆。
其實討論區網站定期做維修檢查好平常，高登伺服器遭網民怒斥慢到無朋友經常發生，至於今次「熄登」真相係點，真係admin先知道嘞。姑勿論高登噚日點解「熄登」，但事件已經令唔少高登友頓時失去生活樂趣，無數高登友大呼好空虛，「上緊堂都掛住上高登」、「成朝無得上高登唔知做乜好」。
有巴打更話「好空虛上網都唔知去邊好」、「我明白高登喺我心目中係幾咁重要」、「無咗高登，好似與世隔絕」。好誇張？高登友係咁o架啦。
YouTubeHK 精選影片 www.youtubehkvideo.com [主頁] [最新影片]
0 comments:
Post a Comment