[娛樂] 林峯倒楣 潘霜霜兩片在握影圈搶手

純情大學生　肉蒲團慾女　潘霜霜兩片在握影圈搶手


[轉載/Youtube] 暴乳36D潘霜霜搭上林峯，「霜峯戀」雖然玩完，但寂寂無聞嘅潘霜霜就紅遍網絡，暑假乘勢出噴血寫真，蕭定一同張堅庭都搵佢開戲，蕭定一睇中潘霜霜一副好身材，接棒演《3D肉蒲團之極樂寶鑑》續集，至於張堅庭就準備今年10月開拍內地劇《我的青春在香港》，打算搵潘霜霜演純情大學生。

「試啲戲得唔得」
潘霜霜經理人林小姐早前已經請蕭定一食檸檬，佢話潘霜霜唔會露點演出。張堅庭話呢排好留意霜峯戀，佢覺得潘霜霜個樣真係好似舒淇，單睇外表就好有潛質，好適合演新劇嘅角色。
張堅庭噚日話：「我哋個故事主要講幾個內地來港留學生喺香港生活嘅艱辛故事，家搵緊人聯絡潘霜霜，睇吓佢有冇興趣試鏡，佢外形就幾好，但都要試吓啲戲得唔得。」潘霜霜最擔心霜峯戀拖垮形象，但家睇嚟前途一片光明，成為搶手貨。
曾喊住求舊愛收手嘅林峯，對於潘霜霜喺內地接受訪問爆料話仲有「好玩」嘅相，林峯就話：「我冇睇到，有時間都睇劇本啦。我冇回應啦，大家專心自己工作啦，希望大家唔好再搵我啦，畀啲空間大家。」

林峯苦笑避舊愛
不過，有指潘霜霜專心工作都每日有新進展，林峯聽到忍唔住笑笑口話：「冇回應呀。」潘霜霜7月推出寫真集，屆時必會來港造勢？林峯話：「希望佢工作上都好。」
另外，林峯緋聞新歡陳嘉桓嘅師傅冼國林，前晚喺尖沙嘴出席曾志偉生日P，話潘霜霜唔打得，唔會搵佢拍戲，反而有啱角色就會搵林峯喎。