[轉載/Youtube] 隔牆有耳：小明去唱 live震撼學界憑一曲《小明上廣州》極速俘虜萬千歌迷嘅兒歌天王李家仁醫生，真係接 show接到停不了，繼殺入時代廣場同上環文娛中心後，上周六應嶺南中學邀請，去第六屆東區聯校音樂會唱 live！單憑李天王三個字，八間學校管弦樂隊一齊同佢合奏，威震學界，震撼程度足媲美 Angela Aki同學生合唱《手紙》。
未熄電話嗌停
八方從特別途徑取得李天王演出片段，直擊呢次空前大合奏。當日李天王身穿湖水藍 Polo恤，外加一件白色西裝褸，雖然大肚腩若隱若現，但巨星風采依然，說話仲幾調皮鬼馬。當大提琴剛剛奏起，單簧管準備發號，全場屏息以待，李天王忽然喊停：「等等，等等，未熄電話。太過快得滯，一嚟到坐低就唱歌。」逗得小朋友開心到呢......。
「小明上廣州，探親友樂同遊......」李天王開金口之餘，仲一邊拍手，一邊叫全場跟佢唱，現場無論老師、學生、家長都同佢拍拍子，唔少人舉機影相。
難得有管弦樂團合奏，唱得一首點夠喉，李天王喺徇眾「安哥」下，又多唱半首《小明上方舟》，贏多次掌聲。所以八方成日都話，做歌星好過做醫生，唔知可唔可以娛樂別人，但最起碼滿足到自己。
0 comments:
Post a Comment